[293] Anno 1586 hatt erbe gelt geleget Auff Michaelis Simen heyber
Seynem kauffe nach drey m(arck) daruon hatt empfangenn
Andres hancke tzwo m(arck) vnd Sein Sohn Jörge hancke vonn
Rott kirschdorff ein m(arck) geschehenn in den gerichtenn vorm
schultzenn hans Ottenn Jörge ritter, hans domaß, Nickel
Tschentscher, Matz hermann, vnd Mertthen pausewange die
tzeit geschwornne scheppenn

[294] A(nno) 1587 zu Michaheli hat Simon hegber seinem kaufe nach drey
marck Erbgeldt erleget, Daruon hat empfangen Anders
hancke zwo m(arck), vnd neben im sein Son Jockel hancke, eine m(arck)
Geschehen in gerichten fur hans Otten dem scholtzen, neben im
geschworne Scheppen, Gorg Rietter, hans doms Matz hermen
Nickel tschentscher, vnd Merten pauswange

[295] Anno 1588 zu Miechaheli hat Simon hegber seinem kaufe nach
drey marck geleget, Daruon hat empfangen Anders hancke zwo
marck, die ander marck hat Gorge hein, in Ehlicher vormund-
schafft seines weibes Anna, zu sich gehaben, Geschehen in gerichten
fur Hans otten dem scholtzen, neben im geschworne scheppen,
Gorge Rietter vnd Nieckel tschentscher

[296] A(nno) 1589 zu Michaheli hat Simon hegber seinem kaufe nach
3 m(arck) erbgeldt erleget, Dauon empfangen Anders
hancke zwo m(arck), vnd hans hancke sein Son Mutterteil
eine marck, Geschehen in gerichten, fur hans otten
dem scholtzen, neben im Gorge Ritter hans doms
Matz hermen Nickel tschentscher vnd Merten pauswange
als geschworne Scheppen

[297] A(nno) 1590 zu Michaheli hat Simon hegber seinem Kauffe nach 3 m(arck)
erbegeldt erleget, Dauon empfangen Anders hancke zwo
marck Vnd Gorge hancke zu Weis kiersdorff, eine m(arck)
Geschehen in gerichten, fur Hans Otten dem scholtzen,
neben im geschworne Scheppen, Gorge Rietter
Hans Doms, vnd Merten Pauswange