Da einer aber der ander mit der herrschaft willen einen hausgenos heldt, sol-
len dieselbeten befreiet sein, es wer dan d(as) sie die herrschaft zur not zur handt-
arbeit bedurffendt, sollen sie mir fur andern vmb geburlich lon zu arbeiten
schuldig sein, was ander leutte geben, was das spiennen anreichendt, sol-
len sie mir fur andern auch dasselbige verrichten, von einem Jdern stucke
lohn 4 w(eisse) g(roschen), darunter aber ein halb stucke grobwerckens, ein stucke
mittelwerckens, vnd das ander flechsens, das heu vnd grundt aber
sollen sie der herrschaft (zu gleiche) vmbs kesenbrodt aufrechen helffen,
Wan ich aber gras hauen lasse, es sei gleich zu hew, oder zu grunde, sollen
sie mir dasselbete vmbs tage lohn, als sechs zehen heller, bein meiner kust
so guth als es das gesiende isset, vnd bei gemeinem trincken, treulich
vnd vleissigk verrichten,
Fur die eingegebene gresserei, sol mir ein Jder zu Michaheli, geben zwei
Junge hunner, ob sie mir wol personlichen zuuor, von derselbten gres-
serey gegeben zwolff w(eisse) g(roschen), lasse ich dasselbete fallen, nehme dafur die
zwei hunner, darmitte sie in furfallender meiner wirdschaft desto-
vleissiger sein,
Jn vorfallenden sachen aber, wan ich einen botten benotiget, sol er mir eine
meihl vmb 9 h(eller) zu lauffen schuldig sein, vnd solches sol zu gleiche, vom erste(n)
bis zum letzten zechweise rumb gehen,
Diese stucke alle haben beide teil geliebet, gelobet, vnd angenomben, auch mit
mundt vnd handt stet feste vnd vnuorbruchlich ein ander zu halten
versprochen, alles treulichen vnd ohne geferde, darbei gewesen zu
Vnderhandlungk beiden teilen zum besten, hans Otte, Scholtis,
Gorge Rietter der ober, Martinus Blummel der schreiber, vnd
Gorg doms der elter, Vnd hat ider teil ein ausgeschniten zedel
zu sich genomben,
Es sindt aber beide teil, herrschaft vnd Vnderthane fur kreftigen
gerichten erschinen, haben begehret, man wolle zu Ratification
solches ins Scheppenbuch einverleiben lassen, Jst ihnen solches
auff ihr bitten erfolget, darneben beide teil den gerichten
auch angeglobet, solchem vertrag in allen puncten nachzusetzen,
die zeit hans Otte Scholtis, neben ihm Gorge rietter, hans
doms, Matz hermen, vnd Merten pauswange geschworne scheppen